Vegagerðin á villigötum.

Eins og allir ættu að vita, mun fyrirhugaður Gjábakkavegur setja náttúruundrið Þingvallavatn í stórhættu að dómi vísustu manna.  Ómar Ragnarsson setti á dögunum fram tillögur um vegabætur sem gert gætu sama gagn og vegurinn.  Birtist þá ekki á síðum dagblaðanna enn einn útbrunninn fréttamaður, sem orðinn er upplýsingaeitthvað, og nú hjá Vegagerðinni.  Hann var auðvitað orðinn sérfræðingur í samgöngumálum eftir fyrsta daginn í vinnunni.  Hann mælti eindregið með veginum og að þeir ætli að fylgjast voða vel með vatninu.

Hvað er Vegagerðin að reka áróður í svona viðkvæmu og mikilvægu máli?  Hvað kemur Vegagerðinni þetta við?  Hún er bara verktaki sem á að gera eins og henni er sagt.  Held að þeir ættu að halda sig við að ræða Grímseyjarferjuna.

Júlíus Valsson minntist á það hér á blogginu nýlega að fundist hafi mikið kvikasilfur í Þingvallaurriðanum og sagði að hugsanlega væri þetta vegna afrennslis frá Nesjavallavirkjun í vatnið.  Ekki hafði maður hugmynd um það.  Verður ekki að rannsaka þetta?

Hvað segir urriðamaðurinn mikli, Össur, við þessu?  Hann er því miður í Þingvallanefnd, sem ekkert gagn gerir við að vernda Þingvelli, ekki eitt einasta orð um þessa háskalegu vegagerð inni í þjóðgarðinum.

ATH. NÝTT NOTENDANAFN:  vidarjonsson.blogg.is

Ómar bregst ekki.

Það gladdi mig að lesa frábæra grein Ómars Ragnarssonar um samgöngubætur sem gera sama gagn og Gjábakkavegur, en eins og kunnugt er á hann að liggja inni í þjóðgarðinum á Þingvöllum og að mati virtustu vísingamanna mun umferðin eitra Þingvallavatn. 

 Ég var farinn að halda að fólk ætlaði að láta Bláskógabyggð og frú Þórunni umhverfisráðherra malbika yfir sig þegjandi og hljóðalaust.  Það ætti að vega þungt sem helsti sérfræðingur í Íslandi segir.  En forustufólki í Bláskógabyggð er ekki við bjargandi og frú Þórunn er fallin á fyrsta prófinu. 

Samfylkingin er að reyna að klóra í bakkann og stofnaði félag til stuðnings frú Þórunni, Græna netið.  Jú,jú, það var ályktað um álverin vondu, en ekki um að frú Þórunn hefur leyft eitrun Þingvallavatns, sem er auðvitað stranglega bönnuð samkvæmt lögum.   

Eitt dæmi um hve Þingvallavatn er einstakt í veröldinni er hversu tært það er.  Það eru mest dæmi um vötn þar sem sést niður á u.þ.b. 5 m dýpi, en í Þingvallavatni má sjá niður á 25-30 m dýpi!  En hversu lengi verður það?  Frú Þórunn er búin að leyfa veginn og eitrið.  Þorir ekki að breyta samkvæmt sinni sannfæringu.  Þá verður hægt að breyta nafninu á félaginu í Græna slýið eða Græna slímið.   

Þessi svonefndu náttúruverndarsamtök verða að gera eitthvað raunhæft í þessu máli, þetta er ekki búið fyrr en það er búið.  Dómstólaleiðin er eftir.                                       

Lítil saga úr apótekinu.

Bý við þau leiðindi að þurfa að taka inn helling af lyfjum, en því miður ekkert af þeim lyfjum sem ég hefði ef til vill áhuga á að taka.  Það eru að sjálfsögðu margir í þessum sporum.  Þessu fylgir einhver kostnaður, en ég kvarta ekki yfir Tryggingastofnun því ég get unnið fulla vinnu, en ég geri mér alveg grein fyrir því að þetta getur verið erfið barátta fyrir þá sem hafa lægstu launin.

Ég hef reynt að kíkja á verðkannanir í lyfjaheiminum og verslað í þeim apótekum sem eru lægst, t.d. í Lyfjaveri og Rimaapóteki.  Lyf, sem hafði kostað 3-4 þúsund, var allt í einu ókeypis í Lyfjaveri fyrir nokkrum misserum og hefur verið síðan.  Ég var ekkert óánægður með þetta og vildi ekkert vera að mótmæla við þessar sætu afgreiðslustúlkur.  Og líður nú tíminn.

Þá gerist það að heimilislæknirinn stingur upp á að senda lyfseðilinn í Lyfjaval og ég jánka því.  Jæja, þegar kemur að því að borga áttaði ég mig á því, þó ég kunni ekkert að fara með peninga, að þetta var meira en ég átti von á.  Ég þrasaði smá, reyndi þó að stilla mig, og í ljós kom að ég átti að borga yfir 4 þúsund fyrir fyrrnefnt lyf.  En allt í einu varð það ókeypis og því borið við að starfsstúlka hefði gert mistök.  Gott og vel, en stuttu síðar kvartaði kona í dagblaði yfir lyfjaokri í þessu sama Lyfjavali og þá var kennt um mistökum starfsstúlku.  Þægileg lausn. 

Flestir þekkja orðið viðskiptasiðferðið hjá lyfsölukeðjunum tveimur, og ekki af góðu.  Þær gera litlu apótekunum ,,tilboð sem ekki er hægt að hafna":  Þú selur okkur apótekið, ef ekki, þá opnum við apótek hér við hliðina og lækkum verðið þar til þú gefst upp, en þá færðu að sjálfsögðu minna fyrir það og verður að skrifa undir að þú minnist ekki á þetta við nokkurn mann.  Minna má á hetjulega baráttu konu sem rak apótek í Eyjum við risana, en treysti sér skiljanlega ekki til að eyða mörgum af þessum örfáu árum sem okkur er úthlutað, í svona mannskemmandi stapp.  Ungur maður flutti í heimahagana á Skaganum og opnaði apótek, en þá vildi svo til að verð snarlækkaði hjá hinum.  Hann kærði. 

Fólk verður að reyna að styðja litlu apótekin.  Þetta eru aðferðir sem mafían hefur lengi notað með góðum árangri og félagar í henni eru glæpamenn.  Ég bind vonir við nýja heilbrigðisráðherrann þangað til annað kemur í ljós.

Fyrir nokkrum dögum neyddist ég til að láta senda lyfseðil fyrir margnefnt lyf í Lyfju því að þar er opið að kvöldi til.  Ég veit ekki af hverju ég átti ekki von á góðu, en ókeypislyfið kostaði þar 2,900 kr.  Lyfjafræðingurinn sagði að það hefði aldrei verið ókeypis hjá þeim og ég benti á að það væri vegna þess að þau væru mestu okrararnir og gætu bara átt þetta lyf.  Ég var sæmilega kurteis og rólegur og held ég sé eitthvað að þroskast.

Kaloríulaust sjónvarpskonfekt.

Hættir til að hafa logandi á sjónvarpinu en fylgjast ekkert með.  Ábyggilega óhollt, eins og allt er að verða í seinni tíð.  Var svo lánsamur að hrökkva í samband tvisvar á einum sólarhring, mér til mikillar ánægju og fróðleiks.

Sá Pétur Tyrfings. í miklu stuði ræða dulbúnar skottulækningar og allt þetta húmbúkk sem nú er í gangi, t.d. lithimnulesara, dáleiðslufræðinga, höfuðbeinafólk, heilarar, birkiöskuætur, rope-jóga og hláturjóga o.s.frv. o.s.frv.  Áður var þetta einfalt, konur sem spáðu í bolla og svo einstaka miðill.  Svo er það heilsuefnafárið sem veltir stjarnfræðilegum upphæðum.  Pétur er mælskur og rökfastur og skiljanlegt að höfuðbeinafólkið hafi ekkert viljað við hann tala í sjónvarpssal.  Áfram Pétur!

Eitthvað togaði mig að bókaþætti Egils Helga., en þar er ekki bara verið að velta sér upp úr jólabókaflóðinu og auglýsa.  Fróðlegt að heyra Einar Má Jónsson í Svartaskóla lýsa tískusveiflum í hugmyndafræði. Las dóm um nýju bókina en var engu nær, en ætla nú að lesa hana.  Þetta gæti orðið góður þáttur hjá Agli, en maður var búinn að fá meira en nóg af Agli í því að kreista eitthvað úr blóðlausum pólitíkusum. 

Svo sagði Guðfríður Lilja Grétarsdóttir frá uppáhaldsbók sinni, Karamazov-bræðrunum, sem hún hafði lesið fyrir 15 árum.  Ég öfunda fólk sem man eitthvað, en minnisleysi mitt hefur þó þann kost að ég þarf ekki að eiga nema 10 bækur, auðvitað allt meistaraverk, sem ég les reglulega og koma alltaf jafn skemmtilega á óvart. 

Það var meiriháttar axarskaft hjá vinstrigrænum að veita ekki Guðfríði Lilju verðugt brautargengi fyrir kosningarnar í vor, þessari snjöllu og skemmtilegu konu, sem auk þess er hámenntuð í frægustu háskólum heims. Þau hefðu betur losað sig við eitthvað af þessum körlum sem orðnir er að talvélum, t.d. Ögmund sem virðist telja það sáluhjálparatriði fyrir þjóðina að hann tjái sig um allt sem gerist á milli himins og jarðar. Þeir eru orðnir leiðinlegri en Hjörleifur Guttormsson var orðinn og svo er þeir að sjálfsögðu á móti öllu.

p.s. þær eru fallegar haustlitamyndirnar frá Þingvöllum í Fréttablaðinu í dag.  Þetta allt ætlar Bláskógabyggð og frú Þórunn Sveinbjarnardóttir umhverfisbani að eitra með Gjábakkavegi.  Sorglegt. 

 

 

 

Gufa í umhverfisráðuneyti!

Nei, það er ekki átt við að raki sé í ráðuneytinu.  En það fór því miður eins og hér var spáð, að frú Þórunn þyrði ekki að gera neitt sem gæti valdið teiknibólu í ráðherrastólnum.  Hún ætlar að hefja eyðileggingu Þingvallavatns með lagningu Gjábakkavegar.  Hún tekur ekkert mark á viðvörunum virtustu vísindamanna.

Því er borið við, að vitlaus ráðherra hafi þegar tekið ákvörðunina, að hin auma Þingvallanefnd, sem Alþingi kýs til að vernda Þingvelli, hafi ekki gert athugasemd við vegagerðina því hún hafi ekki skipulagsvald! (má þó skipuleggja klósettin á Hótel Valhöll).  Svo er greinilega tekið mark á þeirri þvælu sem gáfnaljósin í forystu Bláskógabyggðar bera fram sem rök fyrir vegagerðinni.

Fólk býst ekki við miklu af stjórnmálamönnum nú til dags, hvorki að þeir hafi hugsjónir né breyti samkvæmt samvisku sinni.  Margir þeirra standa í þeirri trú að þeir séu hugsjónamenn, en hugsjónir eru látnar víkja þegar um eigin hagsmuni eða flokksins er að tefla.  Ég leyfi mér að efast um að frú Þórunn hafi farið eftir samvisku sinni, en þegar ekki fæst stuðningur við það eina rétta er ekki annað að gera en segja af sér, að öðrum kosti mun hún sitja uppi með skömm á meðan land byggist. 

Hef aldrei getað lært vísu, en rembdist við að muna eina sem ég heyrði fyrir mörgum áratugum, því mér fannst mikið liggja við, kannski var hún svona (frúin gæti reynt að hafa hana yfir verði hún andvaka): 

Landið er selt og svikið / svívirðing aldrei dvín / það þarf ekki að þykja mikið / þótt Þingvellir hefni sín.  

Það er bannað með lögum að spilla Þingvöllum og Þingvallavatni.  Það er hafið yfir allan vafa.  En þrátt fyrir það hefur skapast þetta hættuástand.  Hefur þá ekki átt sér stað lögbrot?  Einhver mundi segja að það lægi í hlutarins eðli.  Einnig leikur grunur á að áliti og varnaðarorðum vísindamanna hafi verið stungið undir stól í ráðuneytinu, og mætti ekki ætla það sé lögbrot þegar um er að ræða umhverfisráðuneyti?  Vonandi fara þessir vösku vísinda-og náttúruverndarmenn með þetta nauðgunarmál gegn náttúrunni fyrir dómstóla.

En þeir þurfa stuðning.  Hvar er nú Framtíðarlandið?  Eru þau föst í Hálslóni, en það er því miður orðinn hlutur?  Landvernd segist vera búin að gera allt.  Það væri liðsauki í baráttumanninum Ómari Ragnarssyni.  Þú gætir örugglega látið gott af þér leiða.

 

Oftúlkun?

Ég rak augun í stórfrétt á vefsíðu Moggans í kvöld og fyrirsögnin var: Öryggisráðið fundar vegna Mýrarinnar. 

Jæja, þá er Baltasar Kormákur búinn að slá í gegn.  En það hlýtur að vera eitthvað meiriháttar vesen í uppsiglingu þegar Öryggisráðið er farið að gagnrýna bíómyndir.  Hef ekki séð Mýrina, en það hljóta að vera einhverjar rosalega djarfar senur í henni eða þá brandarar um Islam.  Ef til vill finnst þeim plakat myndarinnar ömurlega venjulegt.  Eða þá að þeim finnst að taka verði einhverja listræna áhættu þegar menn eiga seðlaprentsmiðju.  En er ekki illt umtal skárra en ekkert umtal?  Já, það blasti ekki alveg við hvernig ætti að túlka þetta.

En viti menn!  Allt í einu hrekkur sjónin í mér í fókus og þá stendur í Mogganum:  Öryggisráðið fundar vegna Myanmar.  Og þá skall á grár hversdagsleikinn, enn einu sinni.

Sætt er sameiginlegt skipbrot.

Ég nefndi það hér um daginn hve það væri mikil lukka að fá kransæðastíflu en ekki lifrarbólgu C.  Það er vegna þess að afstaða heilbrigðiskerfisins (og almennings?) til þessara tveggja sjúkdóma er gjörólík.  Sé það hjartað, þarf maður helst að fara huldu höfði því það er ekki friður fyrir þeim sem vilja allt fyrir mann gera, en sé það lifrin, stendur fólk eitt í t.d. 48 vikna meðferð á mjög sterkum lyfjum sem fylgja erfið andleg og líkamleg veikindi, og svo eru batalíkurnar e.t.v. undir 50%! 

Ég er ekki kominn til himna, en er á himneskum stað, Reykjalundi.  Þar er ótrúlega öflug starfsemi sem miðar að því einu að auka lífsgæði fólks.  Þar eru hjartasjúklingar (auðvita taldir upp fyrstir), fólk sem finnst hversdagsleikinn of grár, fólk sem hefur lent í vítahring vegna matarfíknar, fólk sem hefur fengið heilablæðinu, fólk sem hefur orðið fyrir slysi o.s.frv.  Mér líður eins og að ég væri fluttur heim til mömmu, það er passað upp á allt fyrir mann, maður er rekinn til að gera allt sem hefur verið trassað og maður er sendur snemma í háttinn.  Sem sagt, himneskt. 

Bláskógabyggðarbull.

Greindarvísitala leiðtoga Bláskógabyggðar virðist vera langt fyrir neðan það sem eðlilegt má teljast.  Oddvitinn segir, í tilefni af því að vatnalíffræðingur varar við því að mengun frá Gjábakkavegi muni spilla framtíðarvatnsbóli höfuðborgarsvæðissins, að vegurinn hafi verið ein af forsendum sameiningar sveitarfélaga í Bláskógabyggð. 

Hvaða máli skiptir það þegar um er að ræða verndun Þingvallavatns?  Hann talar um að 3 börn þurfi að sitja lengi í skólabíl og skilur greinilega ekki að hægt er að hafa skóla nær heimilum þeirra. 

Hann kallar álit Péturs M. Jónassonar, fyrirverandi forseta Alþjóðasamtaka vatnalíffræðinga og prófessors við Kaupmannahafnarháskóla, sem varað hefur við Gjábakkavegi, sleggjudóma! 

Oddvitanum, Margeiri Ingólfssyni, finnst lágmark að menn sýni fram á það sem þeir eru að tala um með rannsóknum!  Á þá fyrst að eyðileggja vatnið svo að hægt sé að rannsaka skaðann?  Þessu liði í Bláskógabyggð er greinilega ekki sjálfrátt að vilja stuðla að umhverfisslysi.

Þetta sveitarfélag ætti að skipta um nafn og heita Sumarbústaðabyggð.  Að lokum legg ég til að Bláskógabyggð verði lögð í eyði.

Bob Dylan fær Nóbelsverðlaunin!

Mikið væri nú ánægjulegt að sjá þessa fyrirsögn ofarlega á forsíðu Moggans!  Jafnvel þótt það væri aprílgabb.  Dylan er einn mesti listamaður samtímans.  Besti lagasmiður síðustu áratuga og textarnir, sem hafa verið aðalsmerkið, verða æ betri.  Dylan er stórskáld.  En þetta vita nú allir.  Ég fékk fyrsta umtalsverða músik-kikkið þegar ég hlustaði á fyrstu Stones-plötuna með stúlku sem heitir Álfheiður og stal svo frá henni plötunni.  Er ennþá með samviskubit.  Nú er ég því miður löngu hættur að fá kikkið, nema þegar nýtt kemur frá Bob Dylan og síðast mátti maður bíða í heil fimm ár!

Sennilega eru orður, titlar og verðlaun einungis eftirsókn eftir vindi.  Skýrt dæmi eru Oskarsverðlaunin, en ótrúlega margar lélegar myndir hafa fengið þau eða verið tilnefndar, og er meira að segja íslenskt dæmi um það.  Þessi verðlaun snúast eingöngu um peninga.  Nýlegt dæmi um fáránleikan er að leikkonan Laura Dern, sem lék frábærlega í myndinni Inland Empire eftir David Lynch, var ekki einu sinni tilnefnd þótt Lynch hafi að mér skilst, staðið með belju í bandi á fjölförnum stað til að vekja athygli á leikkonunni.  David Lynch hefur alltaf verið sérstakur.

Að lokum legg ég til að Bláskógabyggð, sem hefur þá stefnu að eyðileggja Þingvallavatn svo að þeir geti selt fleiri lóðir undir sumarbústaði, verði lögð í eyði.

 

 

Játningar Viðars J. - framhald.

Hef ekki ennþá ákveðið hvort ég játi eitthvað á mig í þessu bloggi.  En ég ætla að reyna að endursegja dæmið úr Herzog-myndinni The Wild Blue Yonder, sem maðurinn sem sagðist vera frá annari vetrarbraut, tók til að varpa ljósi á stöðu okkar jarðarbúa þegar við hefðum lokið við að drepa jörðina.

Árið 1977 héldu Voyager-geimförin tvö af stað og eru nú að komast út úr sólkerfinu.  Árið 1989 fór Galileo-farið að kanna sólkerfið og engir byggilegir staðir sáust.  Næsta stjarna við okkur, Alfa Centuri þar sem hitinn er 2 milljónir gráða og gæti verið óþægilegur, er í 4,5 ljósára fjarlægð.  Sé miðað við hefðbundið eldflaugaeldsneyti þyrfti, til að ná 30% af ljóshraðanum, ekki bara alla bensíntanka á jörðinni eða einn á stærð við Klettafjöllin, heldur allan massa í geimnum sem sjá má með berum augum, þ.e. jörðina, sólina, sólkerfið, Vetrarbrautina, allar stjörnur í nálægum vetrarbrautum (efni=orka lærði maður í máladeild, en nú er það víst ekki svona einfalt). 

Og hversu hratt höfum við komist?  Voyager hafði náð 88,000 km á klst árið 2005.  Ef mannað geimfar sem fer með þeim hraða hefði lagt af stað fyrir 20,000 árum til Alfa Centuri, hefði það í dag aðeins lokið 15% leiðarinnar.  Í geimfarinu hefðu lifað 500 kynslóðir með úrkynjun, byltingum og morðum og enginn veit lengur til hvers var lagt af stað eða hvaðan.  Fjarlægðin til staðar sem gæti verið byggilegur er ekki 4,5 ljósár, líklegra að hún sé 200,000 ljósár! 

Það virðist ekki vera nein töfralausn önnur en að bjarga jörðinni.  Ef við ætlum að fara eitthvað verðum við að hugsa okkur þangað.  Það þarf að fá sem mest af afburðagreindu fólki inn á þetta svið.  Ég játa að ég botna ekkert í þessu en hef áhuga og finnst vanta umfjöllun og námskeið fyrir þá sem ekkert skilja.  Fólki finnst e.t.v. óþægilegt að hugsa um þessar risastærðir allar, svipað og við óttumst dauðann og svart tómið, en við fundum nú upp trúarbrögðin til að reyna að redda því.

Er nokkuð meira spennandi en geimurinn?  Kannski börnin okkar, gul rós eða pönnukaka með rjóma, en þá er það líka upp talið.

Að lokum legg ég til, að Bláskógabyggð sem allt vill gera til að eyða Þingvallavatni, verði lögð í eyði.